2013 جىلى ەلباسى نۇرسۇلتان نازارباەۆ «قازاقستان رەسپۋبليكاسىنداعى كاسىپتىك جانە وزگە دە مەرەكەلەر» تۋرالى جارلىققا وزگەرىس ەنگىزىپ, قىركۇيەكتىڭ ەكىنشى جەكسەنبىسىن وتباسى كۇنى دەپ بەلگىلەگەن بولاتىن.
ء«بىزدىڭ قوعامدا وتباسى ارقاشاندا رۋحاني جانە مادەني داستۇرلەردىڭ ساقتاۋشىسى, ءتۇرلى بۋىندار اراسىن جالعاستىرۋشى بولدى جانە سولاي بولىپ قالا بەرمەك. وتباسى كۇنى ءبىزدىڭ قوعامىمىزدا رۋحانيلىقتى, ونەگەلىلىكتى نىعايتۋعا, ەرلى-زايىپتىلار جاۋاپكەرشىلىگىنىڭ ماڭىزدىلىعىن ءسوزسىز مويىنداۋعا ىقپال ەتەدى», دەگەن ەدى ەلباسى وتباسى كۇنىنە ارنالعان العاشقى قۇتتىقتاۋىندا.
وتاسى كۇنى ەلىمىزدىڭ تۇكپىر-تۇكپىرىندە جەرگىلىكتى اتقارۋشى ورگاندار تاراپىنان ۇلگىلى وتباسىلارعا سىي-قۇرمەت كورسەتىلەدى. 2014 جىلدان بەرى ەلباسى ۇسىنىسىمەن اتالمىش مەرەكەگە وراي «مەرەيلى وتباسى» ۇلتتىق بايقاۋى وتكىزىلىپ كەلەدى.
قاي ۋاقىتتا بولماسىن وتباسىنىڭ ادامزات ۇرپاعىنا ىقپالىن ومىردەگى باسقا ەش نارسەنىڭ كۇشىمەن سالىستىرۋعا بولمايدى. «وتان – قۋات, وتباسى – شۋاق» دەپ بىلەتىن ۇلتىمىز وتباسىنىڭ تىنىشتىعى مەن قۇندىلىقتارىن ءبىرىنشى ورىنعا قويعان. بالا تاربيەسىنە ءجىتى ءمان بەرگەن. قازاق تانىمىنداعى اكە-شەشە, اعا-ىنىگە, تۋعان-تۋىسقا قاتىستى ماقال-ماتەل مەن اڭىز-ءاپسانانىڭ ءبارى دە شاڭىراققا ۇيالاعان شاتتىقتى ساقتاۋعا ۇندەيدى. «اكە – اسقار تاۋ, انا – باۋرايىنداعى بۇلاق, بالا – جاعاسىنداعى قۇراق», «اكە كورگەن وق جونار, شەشە كورگەن تون پىشەر», «اعاسى باردىڭ جاعاسى بار, ءىنىسى باردىڭ تىنىسى بار» دەپ حالقىمىز قاشان دا وتباسىنداعى ءار ادامنىڭ مارتەبەسىن بەكىتىپ, بەكەمدەپ وتىرعان.
